政情：搞搞政：發叔賣關子避提退選

早兩日已經講過，新界鄉議局主席劉皇發未有報名參加盤據逾五十年嘅屯門龍鼓灘村代表選舉，令發叔棄選嘅傳聞甚囂塵上。

直至尋日為止，報咗名爭奪龍鼓灘村原居民代表嘅，只有兩位劉姓原居民，之不過，兩位劉先生都唔係發叔。發叔盤據龍鼓灘村逾半個世紀，一旦佢真係退出，消息絕對震撼。不過，發叔尋日現身灣仔會展一個活動時，被追問係咪退出村選，見佢神態自若，仲係邊行邊話咁答：「慢慢自有分曉㗎啦！」

咁即係點？記者當然唔收貨，於是再追問發叔係咪真係退選？佢就笑笑話：「適當嘅時候做適當嘅嘢！」咁係咪覺得係時候退下火線呢？惜字如金嘅發叔，只係再重申一遍，適當時候做適當嘅事，然後就行入離開。

幾時係適當時間？乜嘢係適當嘅事？拖到幾時呢？全部都係問號。對於退唔退選，發叔繼續賣關子，令整件事更加耐人尋味。不過，村代表選舉提名今個禮拜五（二十六日）就截止，發叔到底係咪棄選？等多幾日就會揭盅嘞！