政情：孫太抱不平撐老公縮班

教育局局長孫明揚近日力推中學縮班，惹來各界連環炮轟，連講開天氣嘅天文台前台長林超英都開腔為學弟抱不平，總之群情洶湧唔知點收科。身為孫公「背後女人」嘅孫太鍾小芬，日前Shopping都不忘為老公講好話。

前幾日見到孫太同朋友去咗太子大廈一間珠寶店買首飾兼打牙骹，半個鐘後離開，手上多咗個紙袋。問佢買咗乜靚嘢，佢笑笑口話：「冇買嘢，紙袋入面載住包話梅啫！」莫非佢將珠寶當話梅？

轉個話題問孫公有冇因為縮班風波搞到唔開心，孫太就話：「冇。」仲話孫公只係做番自己應做嘅事。佢話本港出生人口不斷下降，一定要有相應教育政策去配合，可能將來出生率上升，情況又會唔同咗，佢仲話：「我以前教書，都試過教五十幾人一班啦！」

但孫太猛呻，話歸根究柢都係錢嘅問題，如果有人肯攞多啲錢投入教育，就唔使縮班啦！又好難怪孫太咁講，事關煲呔曾只係承諾任內推行小學小班教學，冇話過推中學小班，所以想叫佢開水喉都幾難囉。