政情：李少光買貴樓囝囝呼冤

樓價高企不下，政府上星期五又再出招壓抑短期炒賣活動，高官入貨變得特別敏感。原已持有兩個沙田碧濤花園單位嘅保安局局長李少光，最近四個月內兩度入市，再掃入該屋苑兩個分別一千三百呎同九百五十呎嘅物業，樓價分別係五百五十萬元同三百一十八萬元，點知被某傳媒大書特書。李少光囝囝李霖恩坦言對報道唔開心，仲強調爸爸唔係炒樓。

李少光一向鍾情碧濤花園，上月再入貨，係買畀做演員嘅李霖恩自住，據報剛好可以喺徵收額外印花稅新例前，完成簽訂正式買賣合約。不過，李霖恩話爸爸冇為事件唔開心，反而佢就有啲唔安樂，事關兩層樓中，大嗰層原本係藝人蔡少芬嘅，李霖恩喺毛舜筠穿針引線下買咗層樓，而毛毛就無辜捲咗入新聞裏面。

李霖恩又為爸爸呼冤，指爸爸入市，出於一番好意，想畀兒子一家三口住得闊落啲，唔係炒樓！佢又話：「如果一早知道（政府出招），就遲啲買啦，買平啲嘛。」