政情：方剛錫住廿蚊張出面鬧爆田二少

富貴黨真係家門不幸，上星期又爆出嘅「家變」，本來係中常委嘅田北辰為咗走佢嘅「直選路」，終於同黨分道揚鑣，但佢退黨後餘波未了。

「踩住個黨上位仲抽水」

繼田二少前日喺大氣電波再踩富貴黨，又話自己要做個講道理嘅政客，暗嘲黨內有人唔講道理，矛頭直指同佢喺大家樂扣飯鐘錢風波打對台嘅黨副主席、立法會飲食界議員「廿蚊張」張宇人，仲自我膨脹到自以為係代表全港商界後，富貴黨另一名副主席方剛尋日終於開腔，仲狠批田二少「踩住個黨上位」。

據悉，上星期二方剛喺黨團得悉田二少有意退黨後，佢同廿蚊張即時搵田二少坐低傾傾，可惜最後無功而回。方剛尋日講起時仍然難掩內心不滿，「我發現佢（田二少）真係冇乜黨性，點可以喺個黨傾好立場後又出去發表個人意見？呢啲冇黨性嘅人留喺黨都冇乜用！」佢又炮轟田二少喺黨內唔聽人意見，「好自私」，「你要轉直選，落區派傳單係你勤力；你要上位唔緊要，但都唔好踩住人上位吖！仲喺度周圍抽水！」

向來甚少向人發炮嘅方剛，呢番針對田二少嘅說話都可算非常不留情。何解向來火爆嘅廿蚊張今次吞聲忍氣，改由予人溫文形象嘅方剛發炮呢？原來背後大有故事！原來今次廿蚊張咁克制，都係多得方剛嘅「溫馨提示」。方剛話：「我同佢講：『肥佬，你過埋呢兩年先呀，呢段時候千祈唔好亂講嘢呀！』」廿蚊張自從發表「廿蚊論」後一民望跌穿地底，再咁搞法下屆隨時冇得玩。方剛咁抵得諗，幫佢講出心底話，認真唔話得。

田二少叫咪摷舊事嚟講

面對舊黨友批評，田二少起初只透過助理表明，退黨後會堅守當初與黨主席劉健儀達成嘅協議，唔會回應任何針對舊黨友嘅言論。點知傍晚佢又親自來電，「公說公有理，婆說婆有理」，你一言我一句咁好易變成隔空罵戰，希望舊黨友唔好成日摷番舊事嚟講喎。正所謂「相嗌唔好口」，繼續對罵落去，對大家似乎都冇好處，唔知黨前主席田北俊又點睇呢？