不斷放生淫賤黎 影視處挑戰民意

如果你放生魚蝦蟹或者大烏龜，再唸幾句阿彌陀佛大悲咒，你可能會覺得自己做緊善事，之但係如果你放生嘅係無惡不作嘅淫媒大亨，你到底做緊乜嘢事呢？當然係助紂為虐嘅壞事啦。

香港嘅影視及娛樂事務管理處，唔知係咪平時習慣放生大烏龜，所以經常放生淫賤黎，放生次數之多足以挑戰正常人類嘅記憶能力。呢嗱，最近又有兩宗助紂為虐嘅極壞個案。

今年六月本報揭發三份港產六合彩報《創富》、《六合皇》及《貼士皇》更改承印人資料，涉嫌違反《本地報刊註冊條例》。負責監管嘅影視處話會將案件交由律政司跟進，叮！執法部門居然只係起訴出版人公司，由淫賤黎擔任董事嘅承印人公司完全冇事。告一間唔告一間，呢啲咪就係毫無公道可言嘅「一制兩法」囉，難怪學者以及議員異口同聲話大有問題。

另一宗極壞個案就係咁，壹淫媒旗下網站VDO NEXT V壹網一段名為「如何自行檢查乳房」嘅露點短片，本來已經被淫褻物品審裁處評為第二類物品（不雅物品），叮佢個鎯鎯吖！影視處竟然以「網站已修改警告字眼」為由，拒絕採取法律行動。

可能有人覺得太一叮唔係食齋，冇乜菩薩心腸，所以唔識得欣賞放生大烏龜或者淫賤黎嘅行為藝術。好好好，太一叮姑且將主觀思想擺埋一邊，畀大家睇一睇民間意見。

「東方報業民意調查」顯示，對於港產六合彩報不時走私到內地非法出售，三成受訪者直斥當局無能，對問題束手無策；兩成八批評當局打擊不力，令香港聲譽受損；兩成一認為走私六合彩報情況猖獗。

至於涉案六合彩報只告出版人公司，唔告承印人公司，民意又點睇呢？三成九受訪者不滿當局執法未盡全力；兩成八認為此舉令有關條例形同虛設；兩成一直斥當局告一間唔告一間，出現一個制度兩種法律嘅問題。

嗱嗱嗱，民意非常之咁明顯，影視處不斷放生淫賤黎簡直係與民為敵！

咦，好似講漏咗少少嘢喎，都話放生次數之多足以挑戰正常人類嘅記憶能力㗎啦。太一叮幾乎講漏嘅係，影視處拒絕檢控被評為不雅嘅壹淫媒，兩成九受訪者擔心會變相縱容不良傳媒賣弄色情；兩成九批評當局執法太鬆手，不符合大眾期望；兩成七認為當局應檢控，以起阻嚇作用。

正所謂眾怒難犯，影視處不斷放生淫賤黎等同挑戰民意，後果會係點呢？不如咁講啦，既然影視處唔係一隻大烏龜，廣大市民即使充滿菩薩心腸都冇必要放生！