政情：哥頓太聖誕贈熊啤啤

合和實業主席「哥頓」胡應湘太太郭秀萍尋日以紅十字會總監身份，出席「愛心相連大行動」嘅啟動禮，義賣慈善「絕『袋』雙『熊』」環保袋同零錢包。哥頓太第一個幫襯，仲一買就係一箱，佢話今個聖誕，所有送出嘅聖誕禮物都加埋隻熊落去。呢個活動今年踏入第八年，佢話本來儲齊咁多年唔同造型嘅熊啤啤，不過偶然有小朋友見到鍾意，佢都會割愛送出，所以咪儲極都儲唔齊一套囉，好彩紅十字會總部有齊成套，所以佢都冇心痛。

嚟緊紅十字會將基地搬去西九龍，詳情仲等緊落實。哥頓太話老公好支持，連帶公司同事亦好有善心，個個都義務為新大樓畀意見，但依家最難嘅係要籌集興建大樓經費，好彩紅十字會老友多，所以好多人支持，但仲未達標。佢又話紅十字會係全港嘅唯一血源，所以冇嘢緊要得過叫人捐血，加上新大樓地點仲未正式交收，等紅十字會有地址之後，佢哋就會積極募捐。