政情：方剛爆扣加班飯錢疑雲

早前大家樂扣飯鐘錢風波搞到滿城風雨，唔少集團老闆為咗落實最低工資都唔敢輕舉妄動，以免遭冠上無良僱主稱號。但係好唔好彩，就喺呢個咁敏感嘅時刻，富貴黨立法會議員方剛家族旗下嘅時裝集團Toppy，就爆出扣飯錢糾紛。

有分店職員同本報投訴，話集團舊年向全體員工發咗份通告，講明每逢員工加班超過兩個鐘，就會享有三十五蚊飯錢，仲係現金添。不過，就喺上個月初，集團喺中環分店搞花生騷，二十幾個員工連續兩日加班超過兩個鐘，但到今時今日都仲未畀番飯錢啲員工，問過店舖經理竟然話今次冇得畀，搞到啲員工鬼咁興：「老細係立法會議員，佢不嬲都孤寒，估唔到連呢少少錢都要慳！」

但係集團人事部接受查詢嘅時候就好強調一直冇取消加班有飯錢嘅安排，仲話啱啱上個月尾都有出加班飯錢畀啲員工，相信今次係一場誤會，會同分店經理了解情況咁話。大家樂前車可鑑，方剛睇嚟要(目及)實班下屬，否則好似陳裕光咁招人話柄就唔好啦。