政情：李運強撐打壓樓火

樓價居高不下，政府前幾日再出招遏炒風，依家講成效仲係言之尚早，但理文造紙主席李運強、信興集團副主席David蒙德揚同工業總會副主席Stanley劉展灝，都認為政府應該篤爆樓市泡沫。李運強更加主張樓價要跌一至兩成先至合理，等一般市民可以上車買樓。

沙田馬場尋日有賽事，李運強同兒子李文斌夫婦，仲有親家老爺一齊入場撐愛駒「包裝小子」，可惜三甲不入。李運強話政府打擊樓市，應該由增加土地供應着手，令樓價回落。對於股市，佢認為後市難跌，因為熱錢太多。

Stanley愛駒「彪形好漢」同「包裝小子」同場競技，但同告失利。講起政府打擊樓市措施，佢舉雙手支持，話消除咗泡沫之後，樓市未來至可以健康發展。

David一見到記者，就話最近有新女友，嚇咗記者一跳，細問之下，原來係講緊Panasonic新產品，可換鏡頭嘅數碼相機Lumix GF2。查實市場發燒友已經等緊佢正式面世，佢話希望聖誕節前可以推出，到時會畀記者先睹為快喎！