政情：聖心150歲校友話當年

嘉諾撒聖心書院早幾日舉行一百五十周年校慶晚宴，好多城中名人舊生都返嚟賀吓呢間有「女強人搖籃」之稱嘅母校。

甩咗拖嘅公文袋立法會議員陳淑莊擔任晚宴嘅大會司儀，佢化行妝，着上露肩紅裙，畀班多年冇見嘅舊同學笑佢似「阿梅」梅艷芳。陳淑莊喺聖心由幼稚園讀到中七，難怪佢話：「我係徹頭徹尾嘅聖心人。」喺女人堆中成長，佢大叫感覺好正，難忘當年因為校園枱櫈有限，開飯時圍圈坐喺操場，感覺溫馨。

有份籌備晚宴嘅恒生銀行女大班梁高美懿就重遇三、四十年冇見嘅同學，滿場飛打招呼。咪以為梁太係書獃子，佢自爆讀書時好活躍，既參加籃球隊、田徑隊，仲係合唱團、辯論隊同話劇組成員之一。多年冇唱校歌，梁太都忍唔住同班師姐師妹上台開金口，緬懷昔日情。

八達通前行政總裁陳碧鏵就感謝體育老師發掘佢成為推鉛球高手，原來佢仲係學界冠軍添！陳碧鏵話依家仍在休息中，閒來陪伴家人、瞓覺同睇書，但公司有需要嘅話，會幫董事局做嘢喎。

校慶宴上仲有一位稀客，佢就係英國前首相貝理雅嘅阿嫂Lady Blair嘞。佢上台高舉保留至今嘅聖心幼稚園校服，認真長情。Lady Blair仲帶領一班學生高唱一曲《You raise me up》，掀起晚宴嘅高潮。

喺嘉賓席上仲見到港大內科學系榮休教授楊紫芝。楊教授升中時考入聖心，花咗唔少時間適應。佢話小學時讀中文學校，入到聖心後以全英文教學，一度唔知老師講乜，苦讀下終於名列前茅。