政情：搞搞政：張國柱刨佛經尋智慧

都市人好忙，立法會議員亦唔例外成日呻忙，好似民協嘅立法會議員KK馮檢基同社福界功能界別議員張國柱，前日出席一個慈善基金頒獎禮時都異口同聲話，因為平時好忙，所以冇乜時間睇書輕鬆吓兼吸收新知識。

趁旅行享受讀書樂

張國柱話睇書係佢嘅興趣之一，好可惜平時工作太忙，根本冇時間睇書，只好趁旅行嗰陣睇，一嚟嗰時先有時間，先有咁嘅閒情逸致睇，二嚟可以更加relax，盡情享受讀書樂。

佢話最鍾意睇一啲比較沉悶嘅分析性書籍，例如對社會政策嘅分析。如果本書好睇，仲會重複睇添，其中有關佛教禪宗嘅《六祖慧能》就係佢至愛嘅書之一。

嘩！佢睇佛教禪宗嘅《六祖慧能》，唔通係想尋找慧根、大智慧？咁都唔係冇可能㗎，事關喺議事廳呢個咁嘈雜兼且政黨互相攻訐嘅地方，尤其多咗社民連三子喺度，更加永無寧日，唔好話大智慧，真係少啲政治智慧都唔得！

同場嘅KK就話依家比較少睇書，但閒時都會上吓facebook，透過互聯網進行另一番探索。咁咪即係好似時下青少年咁，沉迷上網，連書都唔睇？