政情：社民連黨慶 長毛下跪
政情：社民連黨慶 長毛下跪
原來政壇「丐幫」一啲都唔窮，睇吓尋晚社民連舉行四周年酒會，喺旺角倫敦大酒樓筵開五十七圍就知啦！呢個係社民連鬧出倒閣風波後首個黨內大型活動，策動倒閣失敗嘅「維園阿哥」任亮憲冇現身，有傳佢喺「毓民牛肉麵」訂咗枱打對台，所以冇嚟。
倒閣風波令社民連面臨分裂危機，未開席前，各名核心滿懷心事，一到開席，人人爭住上台表心迹。主席陶君行用蘇軾嘅詞「也無風雨也無晴」，寄語社民連重新上路；被指背後有份撐維園阿哥倒閣嘅立法會議員「大舊」陳偉業亦話，相信社民連風雨過後會見到陽光，相當感性；而「長毛」梁國雄仲誇張，致辭時突然跪低，高呼：「社民連只有政敵，沒有私敵！」跪足十秒都唔起身，陶君行即刻上前話：「唔好玩啦，毛哥。」
社民連成日鬧高官議員，尋晚到賀嘉賓比白鴿黨黨慶冷清得多，立法會同僚得幾個；官員呢？一個都冇。
長毛致辭時忽然下跪，成十秒都唔肯起身，陶君行即刻上前扶起佢。