政情：當正代表工商界田二少High爆

富貴黨日前又地震，中常委田北辰退黨，背後原因人所共知，就係同該黨立法會飲食界代表「肥仔張」張宇人理念南轅北轍，形勢比人強下被逼退。田二少可能心有不忿，退黨兩日後，尋日喺大氣電波施回馬槍，暗踩富貴黨同舊黨友。

自我膨脹變身中間派

田二少話一直希望影響富貴黨嘅立場同定位，但好困難，因為佢始終在野，同黨內三個立法會議員相比，影響力較弱，而佢受過直選洗禮，知道民間疾苦，路線已由過往注重商界睇法嘅「偏右」，移到「中間」，明白一個政黨如果偏重工商界利益，好難走直選路咁話。咁講法，田二少究竟係證明自己形勢比人強被逼走，抑或喺度慶幸緊跳船跳得快？真係佢自己先知。

佢話要做一個講道理嘅政客，又話希望可以成為立法會議員，為工商界參政起示範作用，走一條平衡僱員同僱主利益嘅路線，商界見直選可攻，就會紛紛組黨參政。

睇嚟田二少唔止想做講道理嘅商界代表，直頭當正自己係全港工商界嘅代表，佢真係自我膨脹得好緊要喎！

咁究竟喺佢眼中，邊個先至係唔講道理嘅商界代表呢？答案不言而喻啦。其實，田二少早喺上禮拜五退黨記者會嘅聲明上已埋下伏筆，當時指喺大家樂扣飯鐘錢風波中，佢認為大家樂做法不智，但「代表功能界別嘅黨友就支持大家樂嘅做法」，呢個黨友，眾所周知係肥仔張。

莎姐矢志留守湊孫界

眼見田二少喺大氣電波再暗踩富貴黨，黨前副主席「莎姐」周梁淑怡尋日中午即時反駁，表明唔同意田二少指黨偏重商界嘅講法，強調該黨走直選之路嘅決心不變，過去幾個月，該黨可能畀人感覺路線「模糊咗啲」，佢同前主席田北俊復出，就係要度橋重建黨內機制，拉近地區黨員同立法會黨團嘅共識，令直選同功能界別「兩條腿」唔好愈走愈遠。

咁莎姐會唔會喺下屆立法會再戰江湖？據了解，佢矢志留守「湊孫界」，重操黨務亦只做軍師，唔做戰將，直選免問！莎姐老公周明權尋日亦對我哋笑眯眯咁話：「佢唔會(直選)o架喇。」都不知幾安樂。