政情：劉展灝潮撐曼聯餐廳

主題餐廳成為潮流，工業總會副主席、運年錶業老細劉展灝（Stanley）係鐘錶界老行尊，不時同工商界老友飯敍，最愛嘅私竇就係尖沙咀樂道三十二號嘅曼聯餐廳，呢間餐廳係佢老友互太紡織非執董劉耀堂（Tony）有份開嘅，Stanley早前就拖埋大仔燊濤（Gary）、細仔燊霆（Ronald）去幫襯。

呢間餐廳今年五月開業，食正南非世界盃熱潮，呢一晚Stanley三父子同經濟動力立法會議員梁君彥胞弟、新興織造廠董事總經理梁嘉彥（Lawrence）又食又傾，現場環境仲一流添！何解？因為足球氣氛濃厚，連男廁嘅一排尿兜正前方都裝咗部四十六吋高清大電視，方便球迷去小解都唔會錯過精彩入球。

餐廳設計咁貼心，皆因Tony同擔任餐廳董事總經理嘅囝囝劉心暉都係曼聯超級擁躉，餐廳行政總廚Philip曾遠赴歐洲學藝，Stanley念念不忘嘅菜係「香烤原隻意大利乳豬」，Tony就重點推介最好賣嘅「七重天雞槌」，七隻雞槌分別以藍芝士醬、沙嗲等七種唔同汁料配製，咬落香脆多汁，口感一流。Tony形容同Stanley係「異父異母」嘅兄弟，散場時，Stanley直接喺餐廳特設戶口扣數，可見佢哋真係好熟。