政情：搞搞政：金勞詹父子睇機會撈底

立法會金融服務界議員詹培忠係股市金牌莊家，佢嘅囝囝詹劍崙（Ricky）繼承咗爸爸嘅衣鉢，連睇市眼光都好相似。家吓熱錢不絕，但內地同香港都出招壓抑樓市，股民難免心慌慌，金勞詹兩父子就信心十足，十足牛市大好友，一個話係撈底時機，一個更話要印股票！

金銀業貿易場前日舉行百周年晚宴暨理監事就職禮，嘉賓話題都離唔開為後市把吓脈，金勞詹坐定粒六，話恒指跌穿二萬三嘅話，大家千祈咪心慌慌，呢個正係入貨良機。佢仲大膽預測，恒指有機會跌到二萬二千點都未定。

身為金銀業貿易場候補理監事嘅公子Ricky認同老竇睇法，話靜待恒指回落時趁機撈底，但現階段未係加碼時候。Ricky仲以大好友口脗咁話：「係人都知個市會升到明年，趁低吸納實冇錯。」Ricky笑言投資股票只係蠅頭小利，話與其買股票不如印股票，嚟緊將搵更多投資項目，將公司上市賺大錢喎。