政情：原居民發叔根據地出選

行政會議成員兼鄉議局主席劉皇發早排傳出申報風波之後，被指有裸退嘅盤算，近期村代表選舉提名期開始咗成個禮拜，發叔盤據超過五十年嘅屯門龍鼓灘村代表選情卻有微妙嘅變化，至今已經有兩個劉姓嘅原居民報名參選，但並唔係發叔，即係話遲啲就算發叔表態參選，都要落場同呢兩個對手砌過。

發叔會唔會爭櫈仔仲未知，但佢有意放棄競逐村代表同屯門鄉事委員會主席嘅消息曝光後，據講一班鄉紳正極力挽留佢。至於龍鼓灘村，現有兩個原居民代表同一個居民代表名額，如果呢個月二十六號提名期截止，原居民代表方面再冇人參選，已經報名競逐龍鼓灘村原居民代表嘅劉東海同劉國明將會自動當選。

其他村代表候選人名單亦有新發現，自稱係何仙姑後人、喺○八年立法會選舉中競逐法律界議席嘅現任律師會副會長何君堯，都喺上個禮拜二報名競逐屯門良田村原居民代表，代替即將任滿嘅原居民代表胞兄何君柱出戰。