政情：何鴻燊上台 親領大紫荊

強颱風鮎魚早前襲港不成，但原訂十月中舉行嘅授勳儀式被迫改期到尋日才舉行。雖然部分受勳人士嘅家人就唔得閒出席，但場面依然非常熱鬧，事關今年破紀錄有七人獲頒大紫荊勳章，不過當中最受注目嘅，當然係全國政協常委、信德集團主席何鴻燊博士獲頒大紫荊喇！

何博士尋日喺多名家人及保鏢陪同下出席授勳儀式，健康明顯愈來愈好，顯得精神奕奕、紅光滿臉，喺隨員協助下自己步行上台，頒授勳章時更毋須攙扶，獲場內一眾政商要人及親友，三度熱烈鼓掌致意，場面令人感動。儀式後何博士到禮賓府後花園與家人合照同供傳媒拍照，並向記者微笑揮手。

何博士雖然冇即場發言或回答記者問題，但其後就透過發言人表示，對獲頒大紫荊勳章感到非常榮幸，強調自己一直十分支持香港發展，能夠為社會出分力，係佢嘅福分：「生於斯，長於斯，我對香港有深厚的感情，能夠參與建設香港，與有榮焉。」

何博士又大讚港人嘅拚搏精神，即使遇到棘手問題，都唔會輕易放棄同說不，勉勵大家要好似佢咁，有「永不言休」嘅精神同「活到老、學到老」嘅生活態度。

何博士相信香港係塊「福地」，佢同所有香港人會本住愛國愛港嘅心，以實際行動支持各項惠及社會與民生嘅活動，齊心協力為香港呢塊福地「添福、添旺、添和諧」！

金刀梁夏佳理美中不足

同樣獲頒大紫荊勳章嘅行政會議成員梁智鴻（金刀梁）同夏佳理（Ron）都相當高興，美中不足係佢哋撐場嘅家人唔係咁齊人。金刀梁嘅太太、大仔同細女都有到場分享喜悅，但喺曼谷工作嘅細仔就行唔開，最終唔齊人見證金刀梁最開心嘅一刻，梁太都話有少少可惜。至於阿Ron嘅情況都差唔多，囝囝喺菲律賓，工作纏身返唔到香港，但阿Ron已約咗幾個香港親人食飯慶祝。