政情：「輕微」變「強烈」天文台震碎招牌

深圳后海灣前日發生地震，本港天文台都拿拿聲喺下晝三點十六分左右發出地震報告，仲騰雞到將一個黎克特制二點八級嘅地震形容為「強烈地震」。由於天文台用咗「強烈」兩個字，傳媒梗係跟進啦，搞到全港街頭巷尾都話「強烈地震」，跟住有市民嗌頭暈、有人話感覺好似有大貨車經過，點知半個鐘之後，天文台又急急澄清只係「輕微地震」。一時一樣，到底發生乜嘢事呢？天文台台長李本瀅尋日認衰兼道歉，話係職員打錯字。點都好，今次地震都足以震到天文台個招牌跌落地，公信力成疑！

輕微地震惹連場虛驚

天文台預報失準係常事，過去更曾因發出颱風警告嘅時機，同市民拗乜嘢時候叫清晨、凌晨。點知凡事講數據嘅天文台今次自製笑話，發稿時好清楚列明係黎克特制二點八級，但就形容今次係「強烈地震」，烏龍得嚟又唔符合常理。權威監測機構竟然將小兒科嘅二點八級地震講成「強烈地震」，仲惹起市民連場虛驚，真係抵打！

李本瀅尋日出席中電主辦嘅「全港學界太陽能挑戰盃2010」活動後，急急解畫，並為天文台職員擺烏龍道歉。佢一臉尷尬咁話事件係手民之誤，可能係職員出稿時心急打錯字，跟住又話，本港錄得有感地震嘅情況唔多，日前地震嘅位置好接近香港。

檢討職員收費報天氣

講到審計署日前發表報告，批評天文台職員去電視台報天氣要額外收費一事，李本瀅解釋話天文台嘅人手編制並冇預算科學主任要「招呼」電視台，而且科學主任都好似一般人咁，返工返足咁多個鐘，仲要額外應付電視報天氣工作都好辛苦㗎。佢叫完苦後，都表示會檢討呢個做法。