政情：CY膝頭疑植屍製韌帶

立法會醫學界功能界別議員「怪醫」梁家騮，尋日出席立法會討論有關人體器官移植規例嘅會議，炮轟政府將條規例拖咗六年都未落實，搞到一啲外國已經普遍應用、含有人體器官嘅醫療產品未能引入香港。

怪醫又即時踢爆，指舊年有行會成員去外國滑雪整傷十字韌帶，因為香港冇得販賣含有屍體加工而成嘅十字韌帶，所以要去美國做手術。怪醫事後唔肯透露係邊個行會成員，仲笑笑口話係病人私隱。

究竟係邊個行會成員呢？嫌疑最大嘅係召集人CY梁振英，因為佢舊年同家人去北海道滑雪，扭傷左腳膝蓋十字韌帶，惟有揸住拐杖四出開會，後來做手術至好番。

尋晚CY出席一個聖誕亮燈活動時，點都唔肯證實係咪植入咗屍體十字韌帶，總之玩神秘，但又唔否認啦！