政情：葉劉怒轟經濟動力治港

因應金融海嘯而推出嘅中小企特別信貸保證計劃今年底屆滿，為咗延續對中小企嘅幫助，商務及經濟發展局局長Rita劉吳惠蘭尋日喺工商事務委員會宣布，決定由金融管理局屬下嘅按揭證券公司揸旗，推出新嘅中小企融資擔保計劃幫中小企借貸，有關詳情，財爺鬍鬚曾同經濟動力成員、按揭證券公司董事梁君彥前日已經宣布晒。

林健鋒同梁君彥尋日喺會議上對Rita多謝前多謝後，仲大讚新計劃推出時間啱啱好，兩者中間冇斷層，一定會支持到底。Rita亦識做，多謝經濟動力一直提供意見。

可能就係見佢哋禮尚往來，一直都質疑按揭公司運作成效嘅匯賢智庫葉劉淑儀即刻火起，炮轟當局唔跟程序做嘢，冇先諮詢財經事務委員會意見就推出新計劃，質疑依家係經濟動力同政府一齊「共治」香港。Rita見勢色唔對，口窒窒想解釋，不過就令葉劉激氣多幾分：「依家係咪林健鋒同梁君彥做埋財政司司長？係咪佢哋講咗就算？」激動到拍晒枱。Rita無法插口，最後仲差啲演變成葉劉同梁君彥罵戰，要委員會主席黃定光調停，事件至稍為平息。

喺發火前，葉劉去咗將軍澳主持新社區中心開幕，全程笑臉迎人，仲自爆自己租咗「發水舖」，因為明明實用面積得四百呎嘅商場舖位，建築面積竟然達九百幾呎，連葉劉自己都嘖嘖稱奇。