政情：搞搞政：公僕學國情諸多限制

國情教育係今年施政報告嘅重點之一，每年亦有唔少公務員北上參加國情研習班。不過，原來依家任何北上嘅公務員，都必須遵守防貪指引，向上司申報利益後再要應付一大輪官僚程序先可以去。聲稱擁有最多會員嘅公務員工會華員會向政府發炮，矛頭直指公務員事務局局長「D姐」俞宗怡。

斥D姐食古不化

根據現行規定，任何公務員參加國情研習班時，如果得到主辦單位津貼有關研習費用，都必須先向部門申報，兼得到批准先去得，以免公務員誤踩貪污陷阱。華員會喺新一期會訊度批評，佢哋已參加咗多年嘅國情研習班，一向都由直屬國家級機關主辦，而公務員亦只為了解國情先參加，直言堂堂國家級機關唔會想藉此賄賂本港公務員，雙方唔存在利益衝突，唔明點解政府咁食古不化、僵化咁硬要佢哋跟足現行指引喎。

華員會咁鬧法，無非係想叫D姐諗清楚，唔好綁得咁死，對公務員諸多限制，只會窒礙公務員了解國情！D姐收到未？

另外，佢哋又狠批喺施政報告中不斷強調要收窄貧富懸殊嘅政府，身為全港最大僱主，竟然學埋商界啲衰嘢，令高低級公務員嘅薪酬調整「高的高」、「低的低」，強烈要求佢哋撥亂歸正，快手收窄番公務員嘅收入差距先好講嘢！