政情：支聯會年宵劉曉波「撐場」
政情：支聯會年宵劉曉波「撐場」
維園年宵攤位尋日公開競投，支聯會主席司徒華每年都會親身到場出手競投，但因為健康問題，尋日改派副主席李卓人做代表。阿人用咗共四萬二千蚊投咗已投幾年嘅一號同二號攤位，事後話原本諗住平過舊年，點知反而貴咗一千七百蚊。
阿人話華叔正康復緊，到時會唔會現身幫市民寫揮春都仲未知，又話：「佢當然好想寫，但我哋擔心佢去人多嘅地方會容易感染。」舊年嘅年宵，華叔已經發現患上末期肺癌，但佢都堅持現身，就算一陣都好。阿人擔心如果華叔缺席，會影響市民嘅捐款數字，所以已經決定會賣諾貝爾和平獎得主劉曉波嘅公仔同杯等精品，希望多啲市民捧場，幫補番啲捐款之餘，同時支持釋放劉曉波。