政情：阿John戥人高興豁達享受人生

呢排坊間大談「80後」、「90後」，年歲往往成為人生負擔，中年危機更令人徬徨。馬會前主席陳祖澤（John）話自己唔後生，享受人生之道就係心境要豁達，後輩做得比自己好，應該戥人高興，因為長江後浪推前浪係必然嘅事。

由熱心人士組成嘅「40+協會」就帶頭表揚社會一班年過四十嘅政商界名人。喺日前舉行嘅「40+典範頒獎禮」，阿John係頒獎禮嘅評審委員會主席，全國政協委員容永祺、立法會議員陳茂波、已轉型做大律師嘅前藝人黃錦燊齊獲獎。四十歲往往被人冠以「老餅」稱號，容永祺就保持一份年輕衝勁，佢自爆日前上廣州睇亞運開幕，睇到興奮之際，逼入人龍尾排隊買首日封，仲輪隊蓋印仔，佢笑言咁大個人從未如此瘋狂過，諗起都覺得好笑。

陪伴老公黃錦燊攞獎嘅趙雅芝年過半百但容顏不老，令人嘖嘖稱奇，秘訣原來係靠做藝人同大律師前曾任職藥劑師嘅老公處方多種維他命丸，佢話：「美麗唔懶得，一定要勤保養至得。」

趙雅芝透露近年積極學電腦，見到潮物iPad、iPhone等，都會八卦一番，總之唔畀自己out。