政情：查雷曼蝸行證人失蹤

調查迷債事件嘅立法會研究雷曼事宜小組委員會，唔經唔覺查咗足足兩年，佢哋唔單止查到金融管理局總裁任志剛退咗休都未查完，勢估唔到連佢哋即將傳召嘅銀行前線職員，有部分都變埋失蹤證人。再咁查落去，數以萬計嘅雷曼苦主幾時先可以攞番個公道呢？

部分銀行職員已辭職

雷曼小組尋日舉行閉門會議，討論傳召銀行前線職員嘅安排。小組主席何鍾泰話，下個月至出年一月，可以聆訊完六間迷債分銷銀行嘅前線職員，然後大約喺出年二月中至四月，着手向雷曼苦主取證。佢仲實牙實齒咁話，四月底之前一定搞得掂，事關最後要寫報告嘛！

即將要去立法會畀議員審嘅銀行職員，包括各間銀行嘅分行經理、投資顧問同銷售人員。我哋聽聞唔係間間銀行都搵齊晒啲人，事關有銀行嘅相關職員中，有部分早已辭咗職兼且銷聲匿迹。吓！咁大鑊？咁仲查乜嘢呀？好彩呢類人為數唔多，未至於影響調查，否則淨係為尋人而拖慢進度就有排煩。

咪以為搞掂班銀行職員之後，輪到人數眾多嘅迷債苦主上場就唔使煩，正因為苦主多，大家都唔知揀邊個！前排小組初步傾過啲挑選準則，例如六十五歲以上長者、第一次買迷債嘅無經驗投資者，或者因為定期到期而買迷債嘅人，三項中兩項就得。問題係四萬幾位苦主之中，符合是但兩項嘅大有人在，最終點樣揀，何鍾泰話未有定案。

拒絕邊聆訊邊寫報告

以往立法會查新機場大混亂、公屋短樁、沙士，以至今屆立法會查梁展文再就業問題，都冇好似查雷曼搞咁耐，難怪先後有十位委員提早鬆人啦！其實仲做緊嘢嘅委員都希望可以快啲收工，所以曾經向何鍾泰提議一邊做聆訊、一邊寫報告，但係何鍾泰唔肯，又話咁樣會令秘書好辛苦，各位迷債苦主惟有再畀多啲耐性啦！