短打長擊：有顆芭蕉心 廢噏可成真

停車熄匙立法擾攘多年，到頭來又係唔湯唔水，既無法改善香港長期高企的空氣污染指數，尤其是中環、銅鑼灣及旺角，長期要抵受「偏高至甚高」的污染空氣，有人甚至擔心中環人會短命些。

停車熄匙即使立法，恐怕香港的天空都係長期灰濛濛，一如打工仔在百物騰貴而人工有減冇加下的心情一樣。停車熄匙底線再三後退，大幅放寬豁免範圍，的士站全部的士毋須熄匙；暴雨警告或酷熱天氣警告生效下，直至當晚午夜所有車輛都可獲豁免；載有乘客的保母車又可獲豁免。小巴就冇咁好彩，維持只有站頭首兩架車可獲豁免。

高官解釋，的士可豁免係考慮到的士站位置多遠離民居。真係廢噏大師，新措施分明歧視小巴及其乘客，明明大細超，卻亂咁出茅招！

環保團體嘲笑邱騰華「已經係閹割到無可再割的版本，再讓步不如唔好做」。咁又唔得噃！慳電膽已無疾而終，停車熄匙豈可再淪八萬五？總之，雖「名不正而言不順」，停車不熄匙，都係為咗大家好大家樂，而非令大家倒（熱到倒在車廂內），焗到大家冇得爽（唔係車震，而係談談情說說愛）！

邱騰華搞環保，招數有幾多，市民無不心清眼亮。佢嘅政策全都即興，似矇矓詩人多過環保專家。你話佢「腦退化」，佢又覺得自己堅毅不屈，有顆熱誠的心，所謂「火燒芭蕉，根焦葉爛心不死」是也！邱局長，有顆芭蕉心，爛泥可變金。堅持將郊野公園變成堆填區吧，有顆芭蕉心，廢噏可成真！