政情：阿松帶隊扶貧做打雜

前財爺梁錦松做番商界猛人後，瞓身同太太跳水王后伏明霞搞國際小母牛香港分會嘅工作，擔任分會主席嘅阿松九月更同小母牛嘅捐贈者一齊去河北農村探訪，Sony PlayStation總經理兼旅遊作家項明生（James）今年出咗本名為《足足五千年》嘅旅遊書，幫小母牛籌到五十萬蚊，所以James都有份隨團北上。

出面交涉助團友上機

James同我哋爆料，話有日去探訪一戶種番茄嘅農家，阿松隨口問一位做滅蟲生意嘅捐贈者，叫佢睇吓啲番茄有冇蟲。個團友仔細check過後就話冇蟲，點知阿松爆肚話：「我咁大條蟲喺度，你都睇唔到？」惹得大家哈哈大笑。

到回程時，佢哋成團人塞車，到北京機場時離起飛只剩半個鐘，航空公司櫃位已停止辦理登機，阿松即刻出面交涉，團友先可以上機，但有三個人因為機位滿座未能同機返港，呢個時候，又係阿松出面交涉，教地勤人員將佢哋升級坐商務艙咪得囉！佢仲話，坐頭等艙嘅阿松夫婦本來可以一早登機，但佢哋一直企喺櫃位側睇住團友check in，所以James都話，此行收穫甚豐，因為見到大家真誠嘅一面。