政情：孫啟烈轟政府跣工商界
政情：孫啟烈轟政府跣工商界
貧富懸殊情況激化，基層市民對商界怨氣好重，政府近期接連出招想化解呢啲戾氣，但係效果麻麻，尋日連工業總會主席孫啟烈都忍唔住批評：「政府做親嘢都適得其反，紓解唔到民怨之餘，又得罪工商界盟友！」
紓解唔到民怨
點解孫啟烈咁好火？原來佢尋日出席一個活動時有感而發。佢話，工商界一向係政府嘅盟友，亦支持政府施政，但係政府推出嘅措施就懶理朋友，譬如「置安心」先租後買政策，佢就認為呢個構思根本係「遠水不能救近火」；至於近日宣布減申亞開支，就更令人哭笑不得。
孫啟烈好不滿咁話，嚟緊政府仲要落實最低工資嘅法例，又要研究公平競爭法，呢啲措施對商界都有好多負面影響，等於踩多工商界兩腳，可惜紓解唔到民怨之餘，又得罪工商界盟友，可見佢對政府嘅施政真係牢騷滿腹噃！
講起政府近日施政，孫啟烈有好多怨言。