政情：搞搞政：林公公矮仔自強人辦

政制及內地事務局局長林瑞麟係議會鬥嘴高手，尋日佢返母校華仁同班師弟見面，講番往事時透露自己一段瘀事。原來佢讀緊中一時，一度因太矮搞到個人冇乜自信，連入羽毛球校隊都唔夠資格，林公公嗰陣時就學曉矮仔要自強，結果增高成功，入咗校隊。

練波增高入羽毛球校隊

林公公話畀班師弟知，自己中一嘅時候好細粒，入學時得四呎六吋半，唔夠高入羽毛球校隊，搞到有啲唔開心，但最後廢寢忘餐狂練波後，中二增高到四呎九吋半，第一次入校隊就攞到獎牌，自此信心大增，之後仲跑埋千五米獲得冠軍，簡直係運動健將。

畢業之後，佢入咗官場，運動嘅時間愈嚟愈少，依家最大嘅運動就係keep住每晚同太太帶埋隻拉布拉多犬由舂坎角屋企行落赤柱，既散步又放狗，再加埋拍拖，返屋企後都會做sit up嘅；至於周末，佢就會跑落山，或者約吓大學同學打羽毛球。即使係咁，佢嘅腰圍都由最fit嘅二十八吋增加到依家嘅三十七吋，但林公公話身形唔使介意嘅，最緊要健康吖嘛。