政情：德成局長拉健兒落水申亞

廣州亞運啱啱開鑼，尋日即傳嚟單車運動員李慧詩奪金嘅喜訊，香港人梗係開心啦，民政事務局局長曾德成都好快發咗份新聞稿以示祝賀。據講，政府繼大平賣申亞之後，計劃遲啲都打算搞個申亞公聽會，搵啲運動員現身拉客支持申亞，可見德成局長一計不成，二計已生。

月底搞公聽會

政府早前將一百四十五億舉辦亞運會嘅開支大減之後，畀立法會議員鬧到飛起，話政府計數兒戲，陷支持申亞嘅議員於不義，依家整個促銷大平賣，相當難睇。德成局長就話之你難唔難睇，計劃本月底搞公聽會，屆時將邀請體育界代表出席畀意見，傳聞包括喺國際賽為港爭光嘅金牌運動員。「風之后」李麗珊尋日都話，聽聞過公聽會件事，但政府仲未正式邀請佢，不過佢補咗句，話作為前運動員，佢絕對支持申亞喎。

德成局長想申亞成功，冇建仔呢個合作夥伴支持都好難成功，睇嚟，佢遲吓都會向建仔埋手，大家再傾過。