政情：楊孫西贏馬擺大閘蟹宴
政情：楊孫西贏馬擺大閘蟹宴
大閘蟹雖然美味，但膽固醇好高，好多食客惟有搵啲藉口同機會先食一餐。福建幫頭領、全國政協常委楊孫西同愛兒楊華勇聯名擁有嘅愛駒「財富之星」，上月中爆冷奪冠後，上禮拜三快活谷夜賽又爆冷奪冠，贏得三十六萬元馬主獎金，愛駒兩度贏頭馬，楊氏父子異口同聲話要請好友食大閘蟹慶祝吓！
兩個月內連下兩城
拉頭馬當晚要離境公幹嘅華勇話，愛駒喺短短兩個月內贏兩次頭馬，算係意外收穫，所以會請食大閘蟹慶祝。佢透露，屋企（即係清水灣「白宮」）每年都會搞一、兩次大閘蟹聚會，皆因佢同爸爸都好鍾意食，但膽固醇高唔敢食咁多，好似早前喺老正興買咗批大閘蟹宴客，佢都只不過食兩隻，點到即止。
至於大閘蟹宴幾時舉行，佢話爸爸上咗廣州睇亞運，等佢返嚟後先能定日期。依家已經係十一月中，佢哋都要快啲安排至得，否則就食水尾喇！
楊孫西（右二）愛駒「財富之星」上禮拜三又贏頭馬，佢話要請好友食大閘蟹慶祝。