政情：霍公子讚囝囝幫得手

廣州亞運會開鑼，由霍英東基金會及南沙區政府共同興建嘅南沙灣畔「奧運廣場」都揀定尋日正式開幕，身兼港協暨奧委會會長嘅霍英東集團主席「霍公子」霍震霆，聯同胞弟霍震寰同霍震宇等霍氏家族成員，一齊遠赴南沙主持揭幕禮。霍家兄弟各有分工招呼賓客，霍公子睇在眼裏都好欣慰，又為父親霍英東建設南沙嘅遺願得到圓滿落實而感慨。

佢哋早上先為博物館嘅霍英東銅像揭幕，跟住為奧運廣場揭幕，然後再進行植樹活動同參觀南沙遊艇會。奧運廣場揭幕時，霍公子三兄弟陪同國際奧委會主席羅格及中國奧委會主席劉鵬主持，參觀南沙遊艇會就由霍啟山領軍。啟山全程招呼羅格夫婦，沿途講解霍家喺南沙嘅發展，同介紹佢主理嘅南沙遊艇會，講得有板有眼。大哥啟剛就負責「打游擊」，招呼唔同賓客。兩個仔咁幫得手，霍公子都笑笑口畀句評語：「今次活動好難得，等啲後生仔幫吓手、學吓嘢啫！」佢最開心嘅都係霍家上下尋日難得聚首一堂。

尋日仲有對神秘嘉賓，新鴻基地產非執董郭炳湘同太太Wendy都有出席活動，佢哋表現恩愛，Wendy仲好落力幫老公影相。郭炳湘話，之前去過南沙幾次，大讚多嘢玩，好似打高爾夫球同坐遊艇出海，鄰近嘅中山同番禺又多美食，所以耐唔耐就會去行吓。問郭炳湘嘅新工作會唔會輕鬆啲？佢就話：「我哋呢啲無所謂啦，有嘢做就做，冇嘢做就歎吓世界囉！」