政情：長毛阿牛闖澳未起行先甩轆

各行各業都有專家，「長毛」梁國雄、古思堯甚至「阿牛」曾健成都可算本港數一數二嘅示威專家，尋日國務院總理溫家寶南下澳門出席一個葡語國家及地區嘅國際會議，幾個團體都想過大海示威，但包括社民連、四五行動等成員在內嘅七人闖關團就全無身經百戰嘅氣概，過程頻頻甩轆，唔係計錯人數，就係唔見船飛，甚至鬧出冇帶身份證嘅虛驚。雖然事前好多人都估佢哋未必可以入境，但闖關咁兒戲，誠意分都冇晒啦！

數漏人頭又唔見船飛

尋日出發去澳門嘅有長毛、古思堯同阿牛等，雖然佢哋個個可算示威專家，但七人同行卻有啲亂。買船飛前，成員循例數人頭，一、二、三、四、五、六，數嚟數去，兩次都係得六個，團友咁「忘我」，長毛都忍唔住插嘴：「你咪第七個囉！」在場實佢哋嘅警察睇到呢一幕亦忍唔住竊笑。

買齊七張飛出發啦，點知臨入閘，又有人話唔記得帶身份證，七個人再次打住，等佢左摷右摷先摸出張身份證。再次起程，又輪到有團友話唔見咗張船飛，擒擒青搵一輪，原來張飛揼咗喺地下。專業示威團搞到好似小學生去旅行咁，實在好失威。一波三折下終於起錨，但太多意外前奏，搞到佢哋闖關不成嘅吸引力都大減。

事後，阿牛都有啲補飛之作。香港人過大海大都可以順利上岸，對澳門碼頭嘅羈留室冇乜了解，阿牛就唔同，尋日佢再次被拒入境，事後有新發現。佢話以前畀人帶入房時，只有呆坐嘅份，家吓好囉，竟然有飲品招呼，可樂、咖啡都有得揀。咁都未算，以前要遣返佢哋時，手續有排搞，依家就駕輕就熟，效率大增。所以阿牛都贈一句：「澳門當局嘅處理手法愈嚟愈文明！」梗係啦，同樣去澳門請願嘅支聯會要同澳門邊防人員拉拉扯扯，佢哋獲上賓招呼，咁仲唔文明？