政情：胡椒粉對付示威笑死人！
政情：胡椒粉對付示威笑死人！
立法會議員經常畀人質疑論政水平偏低，兼成日唔出席立法會會議，大家嘅印象係有由來嘅！「IQ博士」黃宜弘尋日出席保安事務委員會會議討論集會同遊行準則時，就鬧出笑話。
話說有議員指摘警方亂用胡椒噴霧，接住輪到IQ博士講嘢時，佢竟然話「我都明白警方有時要用到胡椒粉、警棍……」立即惹來全場大笑，畀委員會主席涂謹申笑住口咁糾正係胡椒噴霧，有議員走咗出門口，都要返轉頭寸IQ博士，「係胡椒噴霧呀，阿叔」！唔知係咪錯開會傳染，跟住輪到林大輝發言，又試係咁「胡椒粉」、「胡椒霧」，講到最尾諗過度過先講得到胡椒噴霧四隻字，再次惹嚟全場大笑，連一直苦口苦面嘅保安局副局長黎棟國都忍唔住笑埋一份。其他議員見狀亦唔執輸，張文光即刻就借機揶揄警方對付示威者手法，「今日唔用胡椒粉，咪用辣椒醬，聽日唔用警棍，咪用電槍……」
黃宜弘錯將胡椒噴霧說成胡椒粉。
林大輝最後好小心至讀出胡椒噴霧。