政情：搞搞政：建仔甄選新人戰立會

雖然下屆立法會增加十個直選議席，但仍然係僧多粥少，隨着第二梯隊爭奪出選權嘅競爭愈嚟愈激烈，建仔亦要求變。據了解，建仔內部已成立工作小組，專責研究立法會直選出戰權甄選機制，敲定方案後交由黨主席譚耀宗揸旗嘅選舉委員會定案，再經中委會拍板，預料最快喺下屆立法會選舉中首度登場，屆時黨內有志直選之士未同其他政黨廝殺，內部已先展開一場大火併。

建仔一向走權威管治，每次立法會直選出戰機會誰屬嘅決定權，長官意志佔好大比重，設立甄選考核機制都算係肯走前一步。消息透露，甄選機制涵蓋五區直選同功能界別區議會超級議席，選拔嘅具體細則未定，估計會按選拔政策副發言人制度為樣本，邊位黨員想參選都可以報名，然後進行面試遴選，按報名者嘅地區政績、知名度同綜合議政能力各自評分，最高分者就可以攞到出戰立法會嘅入場券。

但有第二梯隊擔心甄選機制運作起嚟會有走樣情況，舉例講，以知名度評分，新人就肯定唔及現任議員，變相對第二梯隊唔公平；當有兩個競逐者評分相若，好大可能會由中委會投票定奪，咁又會返到係由人嚟決定邊個參選，分分鐘引起更多黨內爭拗。