政情：白鴿版八萬五三不政策齋噏

白鴿黨早幾個月轉軚支持政改方案，被策動變相「公投」嘅公文袋同社民連狂轟可恥、出賣港人同出賣民主，再加埋煲呔曾讚白鴿黨有承擔，變相將死亡之吻塞入白鴿嘴。白鴿黨為求自保，實牙實齒咁話要實行包括對政府政策絕不妥協，要逢政府必反以劃清界線、不接受重要任命在內等嘅「三不政策」，但只係三個幾月貨仔，白鴿黨都堅持唔到，黨主席「鐵頭仁」何俊仁竟然側側膊。

羅致光入關愛基金督委會

政府尋日公布執掌逾百億元嘅「關愛基金」督導委員會嘅名單，當中包括咗白鴿黨前副主席兼立法會前社福界代表羅致光。相信大家都明白喺乜嘢一回事，如果白鴿黨係堅守三不政策嘅話，又點會接受呢個任命，當然亦唔會出現羅致光個名喺督導委員會名單之中，明眼人一睇就知道白鴿黨破咗戒。

老實講，白鴿黨喺早前嘅立法會辯論施政報告致謝動議時亦曾露底，三不政策訂明係逢政府必反，內部竟然傳出話若果佢哋提出任何一個修訂獲得通過，就會支持致謝動議，好彩最後唔成事，否則又爆發轉軚風波。

喺致謝動議呢個異動可見白鴿黨對堅持三不政策有所動搖，之後佢哋嘅議員「高達」李永達被委任為立法規管一手住宅物業銷售督導委員會成員之一，竟然再接受政府嘅委任，顯示三不政策已經穿底。據聞，當時高達事前有向黨高層匯報，但啲高層聽完之後都當冇事發生過。

有黨內消息話，三不政策就好似「八萬五」咁，唔講就唔存在！嘩！咁都得？即係偷偷地抹咗佢，當從來冇講過喇！咁做簡直係同白鴿黨嘅口號「堅定可信」唱反調，一啲都唔堅定、唔可信，可能又畀機會社民連藉此狙擊白鴿黨走入建制派添，白鴿黨真係自己攞嚟衰。