政情：《FLASH on》創刊潮人爭捧

東方報業集團去年底推出時尚特刊—LUXE life（極尚生活）後，反應極受歡迎，今年再接再厲獻上新猷，推出女性潮流周刊《Flash On》。Flash On意思係靈光一閃，但引發無窮創造力，正如《Flash On》面世為大家帶來最新嘅女性潮流資訊，尋日創刊派發已好評如潮，索閱嘅大部分以女性為主，更不乏名媛捧場客，包括恒生銀行創辦人何善衡後人何乃斌太太Anina何倍倩。

經過推出「LUXE life」嘅經驗，本集團打造《Flash On》更加得心應手，尋日早上分別到多個地區免費派發，加上《Flash On》封面名模Melanie Z.嘅服飾鮮艷搶眼，吸引好多女士索閱，而且大部分都係衣着打扮靚靚嘅OL，部分人索取後更急不及待邊行邊翻閱，認真捧場。

內容豐富 資訊高檔

記者喺中午路經中環娛樂行期間，巧遇恒生新抱Anina索閱《Flash On》，佢大讚內容豐富，話無論時裝或扮靚方面資訊都好高檔，彩圖好有專業水準，相當吸引。至於邊部分令佢最深刻，佢較喜歡潮人專欄作家Winifred Lai嘅時裝及化妝品推介，佢話潮人推介潮物會更有說服力。咪以為《Flash On》淨係吸引到OL，男士都一樣爭住索閱，好似Sony Computer Entertainment市場部總經理項明生，一攞到手就大讚刊物排版活潑唔古板，可吸引年輕消費者。東華三院前主席李三元亦認為《Flash On》內容時尚，版面搶眼，適合女性參閱，佢話會攞份返屋企同太太分享，update吓時尚資訊。