烽火台：大家樂不讓大家快樂

愈來愈覺得，大家樂其實好似一句宣洩不滿的粗口。你失業失戀雙料打擊，大家樂咯！佢貧病交煎攞唔到綜援，大家樂咯！我熬夜趕稿忽然死機，大家樂咯！全港長者人數激增，安老政策無以應付，大家大大大家樂咯！

不過最大家樂也莫過於，大家樂的盈利屢創新高，去年營業額激增至四十八億八千萬元，但一萬多名員工平均每人每月只有六千多元人工。請注意，上述薪酬開支包括年薪近千萬元的集團主席，到底基層員工分得幾多，真的是天知地知神知鬼知，唯一可知的是，一定低過傳說中的二十八元最低時薪。古人說，獨樂樂不如眾樂樂，但大家樂管理層獨佔豐厚盈利，硬是不讓大家分享快樂，「刻薄」兩個字當之無愧。

好了，大家樂不予眾樂樂，大家都吹佢唔脹，但那最低工資法令總可以讓基層奴工樂上一回吧？死得佢呀大家樂，竟然使出「扣飯鐘」的界王拳，一邊將時薪輕輕提高三兩元，一邊將有薪飯鐘改為無薪，一來一往間，實際人工因加得減。

如是者，全城怒罵大家樂，集團高層連忙「解畫」，說新安排下，前線員工得以「安享」用膳時間，大家都是受惠者云云。未知折算時薪三千多元的大家樂高層，會否每年自扣百多萬元飯鐘，與前線手足一起安享用膳時間呢？

你為富不仁剝削員工，大家樂咯！仇商情緒日益高漲，大家樂咯！大家一齊罷食血淚快餐，大家樂咯！