政情：社民連冇人撐自絕飯盒會

泛民主派一向有個每周飯盒會，等泛民中人一齊食飯盒，溝通兼聯誼，社民連喺政改方案討論期間，同白鴿黨鬧得好唔愉快，仲話要趕白鴿出飯盒會添，但白鴿黨睬你都傻，尋日社民連又喺會上正式提出要求，但冇人騷佢哋，社民連惟有選擇自我消失一途，話下周起唔再出席飯盒會。

呢個飯盒會本嚟係個聚頭機制，點知社民連尋日公然發難，在座嘅公文袋同其他「散件」泛民議員全部唔支持，話飯盒會從來都冇「趕人」嘅制度，大家鍾意嚟就嚟，唔鍾意嚟都無辦法。社民連副主席吳文遠見冇人撐，即時宣布唔玩，其他人亦冇加挽留。

社民連仲話，遲啲會去信協調下屆區選嘅民主動力，要求佢哋將白鴿黨同民協踢出協調機制，佢哋成日諗住踢走人，最終會唔會又係搞咗自己呢？