政情：怪醫搵銀仲係「地球人」
政情：怪醫搵銀仲係「地球人」
城中潮語多，最近名氣界有種說法，話啲名醫豬籠入水，紛紛進身「月球人」、「星球人」，點解？即係閒閒地一個月，甚至一星期就搵到一「球」，即係一百萬蚊。立法會醫學界議員怪醫梁家騮就自謙：「我仲未離開地球，但求開業後維到皮都開心。」
梁家騮將離開佢做咗廿幾年嘅沙田威爾斯親王醫院，去到中環私人執業，同佢嘅骨科醫生哥哥梁家騏一齊搵真銀，梁氏兄弟揀咗喺立法會對面嘅太子大廈做基地，診所接近一千呎，裝修費相信無六位數字都落唔到樓，之前怪醫話相信佢喺醫管局份公積金，都夠畀開業費喎，呢個診所十一月中就正式開業，怪醫會唔會係下一個唔使搭穿梭機、就上咗「星球」同「月球」嘅名醫呢？佢笑笑口：「阿彌陀佛，唔諗呢啲嘢！」