政情：長氣高達哦到林鄭面黑
政情：長氣高達哦到林鄭面黑
男人周不時攞女人日哦夜哦嘅嘢嚟作文章，不過，男人哦起上嚟，可能連女人都頂唔順。講緊嘅係發展局局長林鄭月娥同白鴿黨嘅高達李永達。
尋日煲呔曾喺禮賓府宴請立法會議員，大部分立法會議員都有出席，多名問責高官都現身午宴做「陪客」，如政務司司長唐英年、發展局局長林鄭月娥、運輸及房屋局局長鄭汝樺、保安局局長李少光等。據講，煲呔曾一開始就嗌議員唔好講乜關愛基金、標準工時、置安心等，餐飯要食得甜甜蜜蜜、恩恩愛愛，結果佢嗰圍枱真係皆大歡喜呀。
呢餐飯筵開六席，議員座位經抽籤決定，高達抽正坐喺林鄭隔籬。據講，佢不停咁哦林鄭，哦到打得局長黑晒面。高達事後猛呼冤，話林鄭唔舒服，面色先至唔好，不過，高達都承認佢的確不斷叫局長研究規管一手樓銷售手法時唔好手軟，即使有人向阿爺投訴都唔好退縮。咁都唔叫哦？