政情：扮嘢文乖孫唔撐嘉年華
政情：扮嘢文乖孫唔撐嘉年華
蘭桂坊一年一度嘅盛事蘭桂坊嘉年華下周五（十二日）一連三日登場，尋日蘭桂坊始祖盛智文（扮嘢文）就拖埋一班性感女郎出嚟大跳森巴舞做宣傳，氣氛熱情高漲，被一班森巴女郎簇擁嘅佢真係好High。
難忘20年前冇中國人扮鬼
扮嘢文又話，最雀躍都係中環和安里喺嘉年華期間變身為玩具反斗城兒童街，大人細路可以共冶一爐，不過佢個乖孫太細，暫時未能參加，惟有期待第日乖孫大個，兩爺孫一齊上陣啦。
佢又透露，啱啱去完四川成都為旗下成都蘭桂坊籌辦萬聖節派對。佢話當地人從未接觸過萬聖節，不過今年初次接觸就玩得好開心，記得廿幾年前佢將萬聖節引入香港時，頭一年都只有外國人扮鬼，去到第二年先至有中國人扮埋一份，玩玩吓就咁變為習慣。
扮嘢文（中）同森巴女郎一齊亮相，為嚟緊嘅嘉年華落力宣傳。