政情：富貴黨洗貴氣博吸中產票

自由黨向有富貴黨之稱，最近黨嘅領導層卻頻出怪招，先有未來副主席田二少田北辰聲討因飯鐘事件畀人搞罷食嘅大家樂，後有主席劉健儀（Miriam）月中喺立法會提動議，促請政府查找社福安全網保障範疇不足同進行檢討。區議會選舉明年舉行，自由黨近期急於洗脫富貴氣，似乎想靠關注民生吸選票，喺區選中收復失地，沿此路入，田二少同Miriam合演嘅為選票而棄富貴嘅戲碼恐會愈來愈多。

自爆食大家樂切雞飯

田二少早前揚言參加罷食行動後，黨友廿蚊張同商界中人都出言揶揄，尋日田二少喺報章寫咗篇二千幾字嘅長文，繼續批評扣減飯鐘錢嘅行動「過分得猶如算死草」，又指大家樂「明加實減」嘅飯鐘招每年只係慳到一百萬元，但面對嘅罷食行動同集團被指「刻薄」嘅形象，無異「檢芝麻丟西瓜，得不償失」，即係商譽一旦受損，有排都醫唔番。田二少仲話僱主應該銘記「過得自己，都要過得人」嘅道理。

一輪狠批之後，田二少又向質疑佢嘅人還擊，話唔少人懷疑佢從未去過大家樂，但佢自爆鍾意大家樂嘅招牌美食燒味，尤其係切雞飯同奶茶添。

動議檢討社福安全網

田二少跟住仲數咗一啲大眾食品，如麥記嘅蘋果批、街坊麵檔嘅雲吞麵等，顯示生活好平民化。

田二少發功以來，自由黨內都有唔少異議，有人仲向Miriam投訴添，但Miriam至今沒有任何表態，嚟緊十七號，更會喺立法會動議要求政府檢討社福安全網，真係好奇。所以政壇人士都關注自由黨會唔會蛻變，即走中產民生路線，向以往嘅富貴講拜拜！