政情：搞搞政：季詩傑劈炮費事一身蟻

嚟緊嘅星期日，社民連將會舉行特別會員大會，商討由「維園阿哥」任亮憲等人提出嘅倒閣動議，但秘書長季詩傑尋日突然宣布辭職，令特別會員大會再添變數。

季詩傑尋日正式向社民連秘書處遞交辭職信，內容大致話近日社民連內部嘅風風雨雨令佢抖唔到氣，佢收到風，一切紛爭都係衝住佢而來，佢諗成件事可能因為自己太直率，經常喺網上發表「不當」言論、又曾經用粗口鬧創黨主席黃毓民，結果搞到今日咁。咁係咪話佢唔想再做「是非精」，亦唔想再惹到一身蟻呢？

搵當事人講番件事，季詩傑承認覺得因為係人事關係太複雜，令佢覺得好煩，雖然係咁，佢唔會因此退黨，因為自己同個黨嘅理念一致。咁如果倒閣失敗嘅話會唔會做番秘書長？佢斬釘截鐵咁話「冇關係」，雖然佢唔覺得倒閣會成功。咁今次事件會唔會窒礙佢參選區議會嘅意欲呀？佢話：「由始至終，只要佢老哥（任亮憲）出聲，我都唔會同佢爭位。辭職同參選兩件事唔可以混為一談！」