政情：立會球隊開鑼戰隨時難產
政情：立會球隊開鑼戰隨時難產
立法會足球隊聽日將會喺沙田運動場迎戰中國企業協會，呢次係足球隊今個立法年度首次比賽，唔知佢哋諗住數人或畀人數幾多粒呢？不過，收到消息話呢場比賽隨時會踢唔成，到時都唔知點算。
身為立法會足球隊領隊嘅資訊科技界議員「IT豪」譚偉豪話，聽日立法會好多會開，部分足球隊鐵膽為咗出席會議，被迫放棄唔踢波，當中包括白鴿黨「高達」李永達。高達係梁展文事件專責委員會嘅副主席，委員會聽日安排咗個馬拉松會議，高達全日唔得閒，肯定唔使預佢踢。
就連隊長工業界林大輝當日都因為要出席自己擔任召集人嘅「社區18」大型活動，而唔可以踢呢場比賽。據IT豪講，隊波依家湊夠腳，但佢對隊員可唔可以踢足全場都有啲擔心，而且如果到時又有人甩底，今年度首場波即時告吹，都咪話唔大吉利是。
立法會足球隊聽日踢本年度首場比賽，但隨時有機會告吹。 資料圖片