政情：陳新滋聞劉曉波變身太極高手

呢排政界、學界同民間上出現連串要求釋放獲諾貝爾和平獎嘅在囚內地異見人士劉曉波行動，事件鬧得熱烘烘，但浸會大會新任校長陳新滋似乎唔多知道，就連浸大三十位教授聯署要求釋放劉曉波，陳新滋一直未走出嚟表態，唔怪得浸大校園民主牆貼晒大字報，問校長去咗邊喇！

浸會大學第四屆普立茲新聞獎得主工作坊尋日搞開幕禮，由陳校長主禮，普立茲獎被譽為「新聞界的諾貝爾」，工作坊開幕禮嘉賓之一美國駐港總領事楊甦棣致辭話，香港傳媒可以連篇累牘報道劉曉波事件，好多地方都做唔到，大家要珍惜咁話。

只知聯署要減租

楊甦棣講普立茲獎都可以扯到劉曉波事件，同陳校長左閃右避嘅態度簡直係相映成趣。

最近陳校長捲入是非，被浸大學生批評對聯署要求釋放劉曉波遲遲未表態，尋日開幕禮結束，記者即刻上前問佢，浸大國事學會發起聯署要求釋放劉曉波行動，點解佢唔響應呀？佢話聯署釋放劉曉波？從來冇收過喎，但浸大學生反對宿舍租金貴、要求減租嘅聯署信就收到一封！咁嘅答案，令在場記者無言以對。

睇嚟陳校長係想轉移視線，扯開話題，等記者問佢有關宿舍嘅事，唔好再糾纏喺劉曉波嘅話題，畀佢甩身。

收到都未必響應

跟住記者再追問有關劉曉波事件，但無論記者點樣追問，陳校長都係嗰句：「唔係咁了解。」佢又話就算收到釋放劉曉波聯署信，都要諗清楚先至回覆參唔參與聯署，總之一副一頭霧水嘅樣，將問題全部耍太極咁耍走晒。

做學術嘅，唔可以匿喺象牙塔，要知社會發生乜嘢事，劉曉波事件咁轟動，陳校長竟然話自己唔了解，無他嘅，擺明係想避開政治炸彈啫！