政情：田少捐靚酒與民同樂

西九海濱長廊尋日擠得水洩不通，唔少市民遠道而來參加由旅發局主辦嘅「美酒佳餚巡禮」，尋日係最後一日，旅發局主席田北俊除上台主持最後一場「名人名酒薈」，仲開酒與眾同樂，將佢捐出嘅六公升裝Mouton-Rothschild Imperial紅酒分成一百五十杯，同一百五十名愛酒嘅市民齊乾杯，酒香飄千里。

賓客盡興，田少happy到極，不過啲酒再甜，都唔及新抱嚟撐場咁心甜。見細田太腹部微隆，睇嚟有四、五個月身孕，田少報喜話快將抱第四個孫，今次係細田太嘅第二胎。美酒當前，細田太為BB着想，唔敢飲酒，全程喺台下為老爺打氣。

嗒咗兩啖Mouton-Rothschild Imperial嘅駿豪集團副主席王英偉對支酒讚不絕口：「極品！好正！入口好滑！」佢都珍藏咗一支八二年「瑪高」，一直唔捨得飲。囝囝王梓軒都唔輸蝕，喺外國讀書時曾修讀品酒課程，練得一身「好武功」，用個鼻聞吓就知支酒是龍是鳳。

梓軒鍾情飲紅酒，但自從做咗歌星後就戒飲，皆因擔心紅酒會令雪白牙齒變色，唔多靚，近年已轉飲白酒。