政情：搞搞政：鬍鬚曾踩同學抬高自己
自稱叻過美司法部長
美國司法部長霍爾德早前嚟香港出席國際知識產權執法會議，鬍鬚曾喺網誌寫到同呢位美國史岱文森高中舊同窗重聚，憶述霍爾德當年成績屬中游，但平均分已經攞接近滿分嘅九十分，反映校風好學，競爭激烈，收生亦好嚴謹。
講到呢度，鬍鬚曾原來想借霍爾德嚟兜個圈抬舉自己，話自己嘅成績比霍爾德「好不了多少」，即係成績好過人啦！又話自己當年嚟到紐約一年，就考到入史岱文森，唔止父母喜出望外，連佢自己都感到驚奇，講到自己成個神童一樣。
鬍鬚曾呢篇網誌，無非想踩人嚟墊高自己，話畀人知佢讀書有幾叻。唉，如果佢真係覺得自己咁叻，就唔會成日錯估財政預測啦！如果佢覺得自己咁叻，不如去美國政府做財政部長，點解仲戀棧特區政府嘅飯碗？與其咁鍾意吹水唔抹嘴，倒不如做多啲實事啦！
設計圖片
美國司法部長霍爾德早前來港，鬍鬚曾專登搵佢合照敍舊。