政情：林公公暗示唔會冧莊
政情：林公公暗示唔會冧莊
有「人肉錄音機」之稱嘅政制及內地事務局局長「林公公」林瑞麟，尋日接受電台節目訪問時終於有驚喜。
林公公喺○二年接任政制事務局局長，負責本港政制發展同選舉規劃足足八年咁耐，在任期間，坊間對佢嘅評價好壞參半，好嘅話佢盡忠職守、恰如其分，唔好嘅就話佢立場保守，好似人肉錄音機一樣，多句都冇。
把口一向密過夾萬嘅佢，無論你點問，都肯定問唔出啲乜，不過唔知佢係唔係良心發現，尋日主持人問下屆仲係唔係由佢負責政制事務時，佢竟然爆出一句：「你訪問我咁耐，你哋都想訪問第二個㗎！」言下之意，似乎係話畀人知，自己下屆唔想再做政制工作。究竟佢有乜盤算呢？係暗示會更上一層樓吖，抑或係離開官場呢個熱廚房呢？