政情:五散人政見分歧隨時散

政情:五散人政見分歧隨時散

立法會「五散人」之一嘅會計界代表陳健波,喺最新一期嘅議會工作報告首頁登咗張五散人月前隨立法會團考察上海世博時嘅相,五人分開站立;喺最後一頁,登番同一背景嘅「全家福」合照,仲係搭晒膊頭。

陳健波講起呢一張相,初時欲言又止,指相片寓意五散人開始時散修修,希望最後可以好似最尾張相咁愈走愈埋,團結一致。追問之下,佢先至吐出一句,指依家五散人中嘅「波波」陳茂波同林大輝似已歸邊,分別與兩位疑似特首候選人CY梁振英同政務司司長唐唐「友好」,佢擔心隨住特首選舉逼近,五散人會愈嚟愈散,屆時真係好令人惋惜咁話。

有「散人」透露,從最近兩件事,可見五散人已現分崩離析危機。好似民主派對施政報告致謝議案提出強烈譴責政府不復建居屋嘅修訂案,從五散人嘅投票取向,就知五人內部已分開唔同陣營,波波同譚偉豪企喺同一陣線,支持修正案,即係不遺餘力批評政府;陳健波投棄權票,實則係消極式反對,同大輝聯手否定修訂案,即係企喺政府嗰一邊,兩邊陣營勢態已成,一直喺五散人角色最疏離嘅梁家騮選擇避席投票,相信就係向四人清楚表態,保持中立。一個議案,五個人出現支持、反對、棄權同唔投票四種取態,五散人依家有幾散可想而知。

Money18 新功能「18好路數」為你預測心水股票升跌機會率

陳健波(左一)希望以後五個人都可以好似張相咁企得咁緊密。 陳健波工作報告圖片