政情：醫委會爆選戰何栢良惡鬥蔡堅

香港醫務委員會專責監管註冊醫生，喺聆訊執業醫生失誤時，雙方好似打仗咁，而醫委會內部最近亦爆發咗一場好激烈嘅選戰。

話說喺醫委會做咗九年委員、身兼醫學會會長嘅蔡堅，同另一委員陳以誠嘅三年任期，將於明年一月中屆滿，雖然兩人決定角逐連任，但並非易事，因為另外有三名猛人參選，包括何栢良同蘇潔瑩，兩人分別係前任同現任公共醫療醫生協會會長，另一人則係港大教授。五個人爭兩個位，可想而知選戰有幾激烈，真係要睇吓邊個手瓜硬喇！

冇公院醫生代表

喺公立醫院做咗逾二十年嘅何栢良，雖然喺○八年立法會醫學界功能組別選舉敗北，輸咗畀「怪醫」梁家騮，但佢決定屢敗屢戰，仲喺參選醫委會嘅政綱透露，本港有一半註冊醫生喺政府工作，但醫委會竟然冇公院醫生代表，佢希望藉今次參選，將五千名公院醫生嘅聲音帶入醫委會，帶嚟衝擊同火花喎！

據聞，醫委會研究緊將來係咪會處理埋對公院醫生嘅投訴，若果通過嘅話，要拎去立法會修例，相信何栢良係想先插隻腳入去，將來喺醫委會討論有關問題時，等公院醫生都有Say。

其實，醫委會得七席係由醫生業界選出，其餘二十一席係政府委任同醫學會代表，點解蔡堅唔等政府委任，反而要出嚟同人爭位？聽聞，蔡堅覺得自己有足夠嘅支持，倒不如留多個位畀自己友，即係其他醫學會嘅成員喎。

12月有選舉結果

面對咁激烈嘅競爭，蔡堅話擔任醫委會委員可以為業界主持正義。有冇信心勝出連任呀？佢形容依家忙到去廁所都唔得閒，一旦落選，仲海闊天空，可以做少好多喎！講到好似唔志在咁，但又出嚟選？

私家醫生蔡堅同公院醫生何栢良，究竟邊個可以入圍？睇嚟呢場競選一定鬥得難分難解，真係要鍊過先知，大家拭目以待十二月嘅選舉結果啦！