短打長擊：最有仙氣政府部門

每逢出事，政府最鍾意玩調查報告，通常報告完成就係高官鬆一口氣之時，因為多數情形就是「冇人要負責」。今次大埔沙埔仔村嚴重水浸事故，七月二十二日的黑色暴雨致一名村民死亡，咁大鑊梗係要調查並找出真相，睇吓渠務署治河有否失職。

村民原先可能都有啲啲期望，又話啲水利專家獨立審核報告，涵蓋五大範疇，村民以為可以查個水落石出，誰知卻來個避重就輕，不「報告」了！理由係死因庭很大機會召開死因研訊，為免影響警方刑事調查，現階段不會公開兩份報告具體內容，只可提供一份「亞聾燒炮——得陣煙」嘅資料摘要。

大佬啊！村民最想知道係水浸及死人是否與河道工程有關及責任問題，如今事隔三個多月，有關部門卻來個大而化之，淡化有否人禍的責任及賠償問題，試問村民怎可釋懷及收貨？政府連指冬瓜話葫蘆的分內事都唔做，咁鬼閃縮，又豈能真正拿出決策，解決問題？

馮友蘭指出，中國缺少清楚的思想，得到的補償是較多的理性的幸福，他們是富於理性的快樂主義者，捨力量而取享受，所以不需科學，他們僅希望征服的是他們自己，因此不要科學的力量，他們看來，智慧的內容不是理智的知識，智慧的功能不是增加物質財富，道家以為物質財富只能帶來人心的混亂。

依我看，高官們都愛與民生息，都愛道家無為而治，不公布調查報告也就沒有問題可探究追查，冇賠償村民不會人心混亂，村民不必太科學，讓真相永藏心底。由此可見，渠務署是最有仙氣的政府部門。